Subscribe to our newsletter and get our newest updates

Hakeem Manzoor

  • Ghazal


be-sud ek silsila-e-imtihan na khol


be-sūd ek silsila-e-imtihāñ na khol
sab dekh dekhtā hī chalā jā zabāñ na khol

andar kā hī na ho zarā bāhar bhī dekh le
dil ḳhuun hai to aañkh pe ḳhūnīñ samāñ na khol

ik gard chhā.egī tire momī dimāġh par
thamne de āñdhiyoñ ko abhī khiḌkiyāñ na khol

chhup jā.egā kahāñ tire hisse kā āftāb
ai sāya-gard sar pe koī sā.ebāñ na khol

imkān ho to kar le havā se musālahat
be-fā.eda hai varna koī bādbāñ na khol

un se yaqīñ kī daulat-e-nāyāb maañg tū
āñkhoñ pe apnī koī fusūñ aur gumāñ na khol

'manzūr' harf harf qalam kā hisāb de
lekin fuzūl daftar-e-sūd-o-ziyāñ na khol

be-sud ek silsila-e-imtihan na khol
sab dekh dekhta hi chala ja zaban na khol

andar ka hi na ho zara bahar bhi dekh le
dil KHun hai to aankh pe KHunin saman na khol

ek gard chhaegi tere momi dimagh par
thamne de aandhiyon ko abhi khiDkiyan na khol

chhup jaega kahan tere hisse ka aaftab
ai saya-gard sar pe koi saeban na khol

imkan ho to kar le hawa se musalahat
be-faeda hai warna koi baadban na khol

un se yaqin ki daulat-e-nayab mang tu
aankhon pe apni koi fusun aur guman na khol

'manzur' harf harf qalam ka hisab de
lekin fuzul daftar-e-sud-o-ziyan na khol


Source: Book : Kitab-e-Rafta (Pg. 154) Author : Firasat Rizvi Publication : Academy Bazyaft, Karachi Pakistan Lahore (2007) Edition : 2007

Leave a comment

+