Subscribe to our newsletter and get our newest updates

Ejaz Gul

  • Ghazal


manzar-e-waqt ki yaksani mein baiTha hua hun


manzar-e-vaqt kī yaksānī meñ baiThā huā huuñ
raat din ek sī vīrānī meñ baiThā huā huuñ

koī sāmān-e-safar hai na masāfat dar-pesh
mutma.in be-sar-o-sāmānī meñ baiThā huā huuñ

kabhī nāyāft kā hai to kabhī kam-yāft kā ġham
vaj.h-be-vaj.h pareshānī meñ baiThā huā huuñ

kār-e-dushvār hai āġhāz se munkir jab tak
kār-e-be-kār kī āsānī meñ baiThā huā huuñ

kal kahīñ rafta meñ thā haal kī hairat kā asiir
ab kisī fardā kī hairānī meñ baiThā huā huuñ

ḳhair ham-zād mirā duur tamāshā.ī hai
shar huuñ aur fitrat-e-insānī meñ baiThā huā huuñ

jism huuñ aur nafas Thahrā hai zāmin merā
sā.at-e-umr kī nigrānī meñ baiThā huā huuñ

ek bāzār-e-tilismāt hai jis ke andar
jeb-e-ḳhālī tirī arzānī meñ baiThā huā huuñ

reg-tā-reg huuñ phailā huā sahrā kī tarah
aur sarāboñ kī farāvānī meñ baiThā huā huuñ

aisā sannāTā hai āvāz se haul aatā hai
ik bayābāñ sā bayābānī meñ baiThā huā huuñ

na maiñ bilqīs ki ho shahr-e-sabā kī ḳhvāhish
na ġham-e-taḳht-e-sulaimānī meñ baiThā huā huuñ

manzar-e-waqt ki yaksani mein baiTha hua hun
raat din ek si virani mein baiTha hua hun

koi saman-e-safar hai na masafat dar-pesh
mutmain be-sar-o-samani mein baiTha hua hun

kabhi nayaft ka hai to kabhi kam-yaft ka gham
wajh-be-wajh pareshani mein baiTha hua hun

kar-e-dushwar hai aaghaz se munkir jab tak
kar-e-be-kar ki aasani mein baiTha hua hun

kal kahin rafta mein tha haal ki hairat ka asir
ab kisi farda ki hairani mein baiTha hua hun

KHair ham-zad mera dur tamashai hai
shar hun aur fitrat-e-insani mein baiTha hua hun

jism hun aur nafas Thahra hai zamin mera
saat-e-umr ki nigrani mein baiTha hua hun

ek bazar-e-tilismat hai jis ke andar
jeb-e-KHali teri arzani mein baiTha hua hun

reg-ta-reg hun phaila hua sahra ki tarah
aur sarabon ki farawani mein baiTha hua hun

aisa sannaTa hai aawaz se haul aata hai
ek bayaban sa bayabani mein baiTha hua hun

na main bilqis ki ho shahr-e-saba ki KHwahish
na gham-e-taKHt-e-sulaimani mein baiTha hua hun


Leave a comment

+