Subscribe to our newsletter and get our newest updates

Bahadur Shah Zafar

  • Ghazal


hote hote chashm se aaj ashk-bari rah gai


hote hote chashm se aaj ashk-bārī rah ga.ī
aabrū baare tirī abr-e-bahārī rah ga.ī

aate aate is taraf un kī savārī rah ga.ī
dil kī dil meñ ārzū-e-jāñ-nisārī rah ga.ī

ham ko ḳhatra thā ki logoñ meñ thā charchā aur kuchh
baat ḳhat aane se tere par hamārī rah ga.ī

TukḌe TukḌe ho ke uḌ jā.egā sab sañg-e-mazār
dil meñ ba.ad-az-marg kuchh gar be-qarārī rah ga.ī

itnā miliye ḳhaak meñ jo ḳhaak meñ DhūñDe koī
ḳhāksārī ḳhaak kī gar ḳhāksārī rah ga.ī

aao gar aanā hai kyuuñ gin gin ke rakhte ho qadam
aur koī dam kī hai yaañ dam-shumārī rah ga.ī

ho gayā jis din se apne dil par us ko iḳhtiyār
iḳhtiyār apnā gayā be-iḳhtiyārī rah ga.ī

jab qadam us kāfir-e-bad-kesh kī jānib baḌhe
duur pahuñche sau qadam parhez-gārī rah ga.ī

khīñchte hī teġh adā ke dam huā apnā havā
aah dil meñ ārzū-e-zaḳhm-e-kārī rah ga.ī

aur to ġham-ḳhvār saare kar chuke ġham-ḳhvārgī
ab faqat hai ek ġham kī ġham-gusārī rah ga.ī

shikva ayyārī kā yāroñ se bajā hai ai 'zafar'
is zamāne meñ yahī hai rasm-e-yārī rah ga.ī

hote hote chashm se aaj ashk-bari rah gai
aabru bare teri abr-e-bahaari rah gai

aate aate is taraf un ki sawari rah gai
dil ki dil mein aarzu-e-jaan-nisari rah gai

hum ko KHatra tha ki logon mein tha charcha aur kuchh
baat KHat aane se tere par hamari rah gai

TukDe TukDe ho ke uD jaega sab sang-e-mazar
dil mein baad-az-marg kuchh gar be-qarari rah gai

itna miliye KHak mein jo KHak mein DhunDe koi
KHaksari KHak ki gar KHaksari rah gai

aao gar aana hai kyun gin gin ke rakhte ho qadam
aur koi dam ki hai yan dam-shumari rah gai

ho gaya jis din se apne dil par us ko iKHtiyar
iKHtiyar apna gaya be-iKHtiyari rah gai

jab qadam us kafir-e-bad-kesh ki jaanib baDhe
dur pahunche sau qadam parhez-gari rah gai

khinchte hi tegh ada ke dam hua apna hawa
aah dil mein aarzu-e-zaKHm-e-kari rah gai

aur to gham-KHwar sare kar chuke gham-KHwargi
ab faqat hai ek gham ki gham-gusari rah gai

shikwa ayyari ka yaron se baja hai ai 'zafar'
is zamane mein yahi hai rasm-e-yari rah gai


Source: Nashuneeda

Leave a comment

+