Subscribe to our newsletter and get our newest updates

Hakeem Nasir

  • Ghazal


mai-kashi gardish-e-ayyam se aage na baDhi


mai-kashī gardish-e-ayyām se aage na baḌhī
merī madhoshī mire jaam se aage na baḌhī

dil kī hasrat dil-e-nākām se aage na baḌhī
zindagī maut ke paiġhām se aage na baḌhī

vo ga.e ghar ke charāġhoñ ko bujhā kar mere
phir mulāqāt mirī shaam se aage na baḌhī

rah ga.ī ghuT ke tamannā yūñhī dil meñ ai dost
guftugū apnī tire naam se aage na baḌhī

vo mujhe chhoḌ ke ik shaam ga.e the 'nāsir'
zindagī apnī usī shaam se aage na baḌhī

mai-kashi gardish-e-ayyam se aage na baDhi
meri madhoshi mere jam se aage na baDhi

dil ki hasrat dil-e-nakaam se aage na baDhi
zindagi maut ke paigham se aage na baDhi

wo gae ghar ke charaghon ko bujha kar mere
phir mulaqat meri sham se aage na baDhi

rah gai ghuT ke tamanna yunhi dil mein ai dost
guftugu apni tere nam se aage na baDhi

wo mujhe chhoD ke ek sham gae the 'nasir'
zindagi apni usi sham se aage na baDhi


Source: Book : Sada-e-ehsaas (Pg. 101) Author : Usha Bhadoriya Publication : C/o Lt. CI. S. Bhadoria, MG& G Area Provost Unil Homi, Bhabha Road, Colaba Military Station, Near Navy Nagar, Colaba Mumbai-100005 (2016) Edition : 2016

Leave a comment

+