Subscribe to our newsletter and get our newest updates

Jaleel Hashmi

  • Ghazal


hum zamane mein mohabbat ke bhikari Thahre


ham zamāne meñ mohabbat ke bhikārī Thahre
dost haiñ sab ke magar dushman-e-jāñ haiñ apne

aaj kī raat kahīñ sho.ala-e-gul hī bhaḌke
jaane kal sub.h kahāñ hoñge ham uḌte patte

jān-e-man ab ke ye ādāb haiñ tere kaise
bāñkpan merī ġhazal kā tirī mahfil meñ luTe

vo sabā hai to rahe kis liye gulshan se pare
ye shab-e-gul hai to kyuuñ sej pe kāñToñ ke kaTe

kyuuñ phire dasht meñ dīvāne hue kis ke liye
ham ko ma.alūm nahīñ pūchhiye un āñkhoñ se

mar chukīñ kab kī tamannā.eñ sisak kar lekin
dil kī dīvār se rātoñ ko koī sar paTke

kahīñ manzil se bhaTak jaa.e na dīvāna-e-gul
jāda-e-shahr-e-bahārāñ meñ bichhā do kāñTe

Daal dil khol ke in TuuTe hue shīshoñ meñ
sañg aa.e haiñ bahut raah meñ ham par pyāre

ye tirī yaad kā aalam shab-e-tanhā.ī meñ
jaise lahrā ke kiran kaalī ghaTā se chhūTe

in bharī rāhoñ meñ sab mire haiñ maiñ kis kā huuñ
duuñ sadā kis ko lage kaun kaleje se mire

kaun utregā mire dil ke gulistānoñ meñ
kaun guzregā mire chehre ke sahrāoñ se

raakh is ghar meñ vo uḌtī hai ki jaise 'hashamī'
taaq meñ sham.a na thī sahn meñ mahtāb na the

hum zamane mein mohabbat ke bhikari Thahre
dost hain sab ke magar dushman-e-jaan hain apne

aaj ki raat kahin shoala-e-gul hi bhaDke
jaane kal subh kahan honge hum uDte patte

jaan-e-man ab ke ye aadab hain tere kaise
bankpan meri ghazal ka teri mahfil mein luTe

wo saba hai to rahe kis liye gulshan se pare
ye shab-e-gul hai to kyun sej pe kanTon ke kaTe

kyun phire dasht mein diwane hue kis ke liye
hum ko malum nahin puchhiye un aankhon se

mar chukin kab ki tamannaen sisak kar lekin
dil ki diwar se raaton ko koi sar paTke

kahin manzil se bhaTak jae na diwana-e-gul
jada-e-shahr-e-bahaaran mein bichha do kanTe

Dal dil khol ke in TuTe hue shishon mein
sang aae hain bahut rah mein hum par pyare

ye teri yaad ka aalam shab-e-tanhai mein
jaise lahra ke kiran kali ghaTa se chhuTe

in bhari rahon mein sab mere hain main kis ka hun
dun sada kis ko lage kaun kaleje se mere

kaun utrega mere dil ke gulistanon mein
kaun guzrega mere chehre ke sahraon se

rakh is ghar mein wo uDti hai ki jaise 'hashami'
taq mein shama na thi sahn mein mahtab na the


Leave a comment

+