rah jaa.e yā balā se ye jaan rah na jaa.e
terā to ai sitam-gar armān rah na jaa.e

jo dil kī hasrateñ haiñ sab dil meñ hoñ to behtar
is ghar se koī bāhar mehmān rah na jaa.e

iqrār-e-vasl to hai aisā na ho na aa.eñ
mushkil hamārī ho kar āsān rah na jaa.e

ai soz-e-ġham jalā de ai dard ḳhuuñ rulā de
kuchh un kī dil-lagī kā sāmān rah na jaa.e

sab manzileñ huiiñ tai mahshar hai aur ai dil
ye ek rah gayā hai maidān rah na jaa.e

vo jām-e-kufr-parvar bhar de ki mast kar de
mastoñ ke dil meñ saaqī īmān rah na jaa.e

aa kar palaT na ḳhālī ai marg jaan le jā
'fānī' ke sar pe terā ehsān rah na jaa.e

rah jae ya bala se ye jaan rah na jae
tera to ai sitam-gar arman rah na jae

jo dil ki hasraten hain sab dil mein hon to behtar
is ghar se koi bahar mehman rah na jae

iqrar-e-wasl to hai aisa na ho na aaen
mushkil hamari ho kar aasan rah na jae

ai soz-e-gham jala de ai dard KHun rula de
kuchh un ki dil-lagi ka saman rah na jae

sab manzilen huin tai mahshar hai aur ai dil
ye ek rah gaya hai maidan rah na jae

wo jam-e-kufr-parwar bhar de ki mast kar de
maston ke dil mein saqi iman rah na jae

aa kar palaT na KHali ai marg jaan le ja
'fani' ke sar pe tera ehsan rah na jae

RECITATIONS Nomaan Shauque



00:00/00:00 rah jae ya bala se ye jaan rah na jae Nomaan Shauque