Subscribe to our newsletter and get our newest updates

Iftikhar Naseem

  • Ghazal


ban gaya hai jism guzre qafilon ki gard sa


ban gayā hai jism guzre qāfiloñ kī gard sā
kitnā vīrāñ kar gayā mujh ko mirā hamdard sā

kyā abhī tak us kā rasta roktī hai koī soch
mere hāthoñ meñ hai us kā haath lekin sard sā

is tarah ghul-mil gayā aa kar na.e māhaul meñ
vo bhī ab lagtā hai mere ghar kā hī ik fard sā

jazb thā jaise koī sūraj hī us ke jism meñ
duur se vo sañg lagtā thā ba-zāhir sard sā

aaj tak āñkhoñ meñ hai manzar bichhaḌne kā 'nasīm'
pairahan melā sā us kā aur chehrā zard sā

ban gaya hai jism guzre qafilon ki gard sa
kitna viran kar gaya mujh ko mera hamdard sa

kya abhi tak us ka rasta rokti hai koi soch
mere hathon mein hai us ka hath lekin sard sa

is tarah ghul-mil gaya aa kar nae mahaul mein
wo bhi ab lagta hai mere ghar ka hi ek fard sa

jazb tha jaise koi suraj hi us ke jism mein
dur se wo sang lagta tha ba-zahir sard sa

aaj tak aankhon mein hai manzar bichhaDne ka 'nasim'
pairahan mela sa us ka aur chehra zard sa


Source: Book : Fanoos (Pg. 43) Author : Abbas Dana Publication : Shahid Book Depot Stedum Road Noor Nagar Rakhyal Ahmdabad (1993) Edition : 1993

Leave a comment

+