paḌe paḌe na.ī zar-ḳheziyāñ nikal aa.iiñ
kaTe daraḳht meñ phir Tahniyāñ nikal aa.iiñ

us aa.ine meñ thā sarsabz baaġh kā manzar
chhuā jo maiñ ne to do titliyāñ nikal aa.iiñ

maiñ toḌ Daalā gayā to imārat-e-jāñ meñ
kahāñ kahāñ se mirī chābiyāñ nikal aa.iiñ

maiñ āsmān pe pahuñchā to laḌkhaḌāne lagā
bulandiyoñ meñ ajab pastiyāñ nikal aa.iiñ

Thahar ga.e to mayassar huī na jā-e-amāñ
jo chal paḌe to ka.ī bastiyāñ nikal aa.iiñ

vahī nasīb ki maiñ shahryār jis se banā
usī nasīb meñ tañg-dastiyāñ nikal aa.iiñ

mire ilaaj ko allāh istaqāmat de
mire marīz kī phir pasliyāñ nikal aa.iiñ

maiñ āsmān se utrā zamīn kī jānib
zamīñ se merī taraf sīḌhiyāñ nikal aa.iiñ

vahī surāḳh jahāñ chhipkilī kā Derā thā
usī sūrāḳh se phir chyūñTiyāñ nikal aa.iiñ

abhī abhī to sambhālā gayā thā gard-o-ġhubār
hisār-e-dasht meñ phir āñdhiyāñ nikal aa.iiñ

sambhāl rakhā thā ammī ne jis ko maut talak
usī kabāḌ se kuchh taḳhtiyāñ nikal aa.iiñ

maiñ āḳhirī thā jise sarfarāz honā thā
mire hunar meñ bhī kotāhiyāñ nikal aa.iiñ

paDe paDe nai zar-KHeziyan nikal aain
kaTe daraKHt mein phir Tahniyan nikal aain

us aaine mein tha sarsabz bagh ka manzar
chhua jo main ne to do titliyan nikal aain

main toD Dala gaya to imarat-e-jaan mein
kahan kahan se meri chabiyan nikal aain

main aasman pe pahuncha to laDkhaDane laga
bulandiyon mein ajab pastiyan nikal aain

Thahar gae to mayassar hui na ja-e-aman
jo chal paDe to kai bastiyan nikal aain

wahi nasib ki main shahryar jis se bana
usi nasib mein tang-dastiyan nikal aain

mere ilaj ko allah istaqamat de
mere mariz ki phir pasliyan nikal aain

main aasman se utra zamin ki jaanib
zamin se meri taraf siDhiyan nikal aain

wahi suraKH jahan chhipkili ka Dera tha
usi suraKH se phir chyunTiyan nikal aain

abhi abhi to sambhaala gaya tha gard-o-ghubar
hisar-e-dasht mein phir aandhiyan nikal aain

sambhaal rakha tha ammi ne jis ko maut talak
usi kabaD se kuchh taKHtiyan nikal aain

main aaKHiri tha jise sarfaraaz hona tha
mere hunar mein bhi kotahiyan nikal aain

Videos
This video is playing from YouTube Videos
This video is playing from YouTube Liaqat Jafri RECITATIONS Liaqat Jafri



00:00/00:00 paDe paDe nai zar-KHeziyan nikal aain Liaqat Jafri