kise batā.ūñ ki ġham kyā hai sarḳhushī kyā hai
abhī zamāne kā me.ār-e-āgahī kyā hai

qadam qadam pe maiñ sambhlā huuñ Thokareñ khā kar
ye Thokaroñ ne batāyā ġhalat-ravī kyā hai

zamīñ pe lāla-o-gul āsmāñ pe maah o nujūm
nigāh-e-hsun-e-nigāh ke liye kamī kyā hai

kamand Daal rahā hai jo chāñd tāroñ par
ḳhudā hī jaane ki taqdīr-e-ādmī kyā hai

nafs kī āmad-o-shud par bhī iḳhtiyār nahīñ
ye zindagī hai to maqsūd-e-zindagī kyā hai

vafā-parastoñ se kyuuñ zid hai us pe sab chup haiñ
savāl ye hai ki is kā javāb hī kyā hai

'urūj' tīrgi-e-shab kā ehtirām karo
isī se tum ne ye jaanā ki tīrgī kyā hai

kise bataun ki gham kya hai sarKHushi kya hai
abhi zamane ka mear-e-agahi kya hai

qadam qadam pe main sambhla hun Thokaren kha kar
ye Thokaron ne bataya ghalat-rawi kya hai

zamin pe lala-o-gul aasman pe mah o nujum
nigah-e-hsun-e-nigah ke liye kami kya hai

kamand Dal raha hai jo chand taron par
KHuda hi jaane ki taqdir-e-admi kya hai

nafs ki aamad-o-shud par bhi iKHtiyar nahin
ye zindagi hai to maqsud-e-zindagi kya hai

wafa-paraston se kyun zid hai us pe sab chup hain
sawal ye hai ki is ka jawab hi kya hai

'uruj' tirgi-e-shab ka ehtiram karo
isi se tum ne ye jaana ki tirgi kya hai

Source: Saat Suron Ki Mithi Halchal