hāl-e-dil kahne ko kahte ho to kab tum mujh ko
haa.e jis vaqt nahīñ tāb-e-takallum mujh ko

ḳhaak ho kar bhī vahī hasrat-e-pā-bos rahī
ho ga.ī mauj-e-sabā mauj-e-talātum mujh ko

zo.af se haal ye patlā hai rah-e-ulfat meñ
sail-e-girya pe bhī hāsil hai taqaddum mujh ko

kahte haiñ zikr-e-shab-e-vasl pe kyā jāniye kyuuñ
kabhī sharm aur kabhī aatā hai tabassum mujh ko

mo.ajiza hazrat-e-īsā kā thā be-shubah durust
ki maiñ duniyā se gayā uTh jo kahā qum mujh ko

sail-e-girya kī badaulat ye huā ghar kā haal
ḳhaak tak bhī na milī bahar-e-tayammum mujh ko

un ko gin gin ke shab-e-hijr basar hotī hai
taare āñkhoñ ke na kyuuñ hoveñ ye anjum mujh ko

hai gazī gāḌhā hī 'kaifī' kā shi.ār aur visār
nahīñ darkār hai ye atlas-o-qāqum mujh ko

haal-e-dil kahne ko kahte ho to kab tum mujh ko
hae jis waqt nahin tab-e-takallum mujh ko

KHak ho kar bhi wahi hasrat-e-pa-bos rahi
ho gai mauj-e-saba mauj-e-talatum mujh ko

zoaf se haal ye patla hai rah-e-ulfat mein
sail-e-girya pe bhi hasil hai taqaddum mujh ko

kahte hain zikr-e-shab-e-wasl pe kya jaaniye kyun
kabhi sharm aur kabhi aata hai tabassum mujh ko

moajiza hazrat-e-isa ka tha be-shubah durust
ki main duniya se gaya uTh jo kaha qum mujh ko

sail-e-girya ki badaulat ye hua ghar ka haal
KHak tak bhi na mili bahar-e-tayammum mujh ko

un ko gin gin ke shab-e-hijr basar hoti hai
tare aankhon ke na kyun howen ye anjum mujh ko

hai gazi gaDha hi 'kaifi' ka shiar aur wisar
nahin darkar hai ye atlas-o-qaqum mujh ko