Subscribe to our newsletter and get our newest updates

Fani Badayuni

  • Ghazal


jine ki hai ummid na marne ka yaqin hai


jiine kī hai ummīd na marne kā yaqīñ hai
ab dil kā ye aalam hai na duniyā hai na diiñ hai

gum haiñ reh-e-taslīm meñ tālib bhī talab bhī
sajda hī dar-e-yār hai sajda hī jabīñ hai

kuchh maz.har-e-bātin huuñ to kuchh mahram-e-zāhir
merī hī vo hastī hai ki hai aur nahīñ hai

iizā ke sivā lazzat-e-īzā bhī milegī
kyuuñ jalva-gah-e-hosh yahāñ dil bhī kahīñ hai

māyūs sahī hasrati-e-maut huuñ 'fānī'
kis muñh se kahūñ dil meñ tamannā hī nahīñ hai

jine ki hai ummid na marne ka yaqin hai
ab dil ka ye aalam hai na duniya hai na din hai

gum hain reh-e-taslim mein talib bhi talab bhi
sajda hi dar-e-yar hai sajda hi jabin hai

kuchh mazhar-e-baatin hun to kuchh mahram-e-zahir
meri hi wo hasti hai ki hai aur nahin hai

iza ke siwa lazzat-e-iza bhi milegi
kyun jalwa-gah-e-hosh yahan dil bhi kahin hai

mayus sahi hasrati-e-maut hun 'fani'
kis munh se kahun dil mein tamanna hi nahin hai


Source: Book : Nuskha Hai Wafa (Pg. 360)

Leave a comment

+