Subscribe to our newsletter and get our newest updates

Haidar Ali Aatish

  • Ghazal


kya kya na rang tere talabgar la chuke


kyā kyā na rañg tere talabgār lā chuke
mastoñ ko josh sūfiyoñ ko haal aa chuke

hastī ko misl-e-naqsh-e-kaf-e-pā miTā chuke
āshiq naqāb-e-shāhid-e-maqsūd uThā chuke

kaabe se dair dair se kaabe ko jā chuke
kyā kyā na is do-rāhe meñ ham pher khā chuke

gustāḳh haath tauq-e-kamar yaar ke hue
hadd-e-adab se paañv ko aage baḌhā chuke

kan.āñ se shahr-e-misr meñ yūsuf ko le ga.e
bāzār meñ bhī husn ko āḳhir dikhā chuke

pahuñche taḌap taḌap ke bhī jallād tak na ham
tāqat se haath paañv ziyāda hilā chuke

hotī hai tan meñ ruuh payām-e-ajal se shaad
din vāda-e-visāl ke nazdīk aa chuke

paimāna merī umr kā labrez ho kahīñ
saaqī mujhe bhī ab to pyāla pilā chuke

dīvāna jānte haiñ tirā hoshyār unheñ
jaame ko jism ke bhī jo purze uḌā chuke

be-vaj.h har dam aa.ina pesh-e-nazar nahīñ
samjhe ham aap āñkhoñ meñ apnī samā chuke

us dilrubā se vasl huā de ke jaan ko
yūsuf ko mol le chuke qīmat chukā chuke

uTThā naqāb chehra-e-zebā-e-yār se
dīvār darmiyāñ jo thī ham us ko Dhā chuke

zer-e-zamīñ bhī taḌpeñge ai āsmān-e-husn
betāb tere gor meñ bhī chain pā chuke

ārā.ish-e-jamāl balā kā nuzūl hai
andher kar diyā jo vo missī lagā chuke

do abrū aur do lab-e-jāñ-baḳhsh yaar ke
zindoñ ko qatl kar chuke murde jilā chuke

majbūr kar diyā hai mohabbat ne yaar kī
bāhar ham iḳhtiyār se haiñ apne jā chuke

sadmoñ ne ishq-e-husn ke dam kar diyā fanā
'ātish' sazā gunāh-e-mohabbat kī pā chuke

kya kya na rang tere talabgar la chuke
maston ko josh sufiyon ko haal aa chuke

hasti ko misl-e-naqsh-e-kaf-e-pa miTa chuke
aashiq naqab-e-shahid-e-maqsud uTha chuke

kabe se dair dair se kabe ko ja chuke
kya kya na is do-rahe mein hum pher kha chuke

gustaKH hath tauq-e-kamar yar ke hue
hadd-e-adab se panw ko aage baDha chuke

kanan se shahr-e-misr mein yusuf ko le gae
bazar mein bhi husn ko aaKHir dikha chuke

pahunche taDap taDap ke bhi jallad tak na hum
taqat se hath panw ziyaada hila chuke

hoti hai tan mein ruh payam-e-ajal se shad
din wada-e-visal ke nazdik aa chuke

paimana meri umr ka labrez ho kahin
saqi mujhe bhi ab to pyala pila chuke

diwana jaante hain tera hoshyar unhen
jame ko jism ke bhi jo purze uDa chuke

be-wajh har dam aaina pesh-e-nazar nahin
samjhe hum aap aankhon mein apni sama chuke

us dilruba se wasl hua de ke jaan ko
yusuf ko mol le chuke qimat chuka chuke

uTTha naqab chehra-e-zeba-e-yar se
diwar darmiyan jo thi hum us ko Dha chuke

zer-e-zamin bhi taDpenge ai aasman-e-husn
betab tere gor mein bhi chain pa chuke

aaraish-e-jamal bala ka nuzul hai
andher kar diya jo wo missi laga chuke

do abru aur do lab-e-jaan-baKHsh yar ke
zindon ko qatl kar chuke murde jila chuke

majbur kar diya hai mohabbat ne yar ki
bahar hum iKHtiyar se hain apne ja chuke

sadmon ne ishq-e-husn ke dam kar diya fana
'atish' saza gunah-e-mohabbat ki pa chuke

RECITATIONS Fasih Akmal



00:00/00:00 kya kya na rang tere talabgar la chuke Fasih Akmal

Leave a comment

+