Subscribe to our newsletter and get our newest updates

Jameel Yusuf

  • Ghazal


go husn ki surat hain meri samt rawan bhi


go husn kī sūrat haiñ mirī samt ravāñ bhī
ik ḳhvāb sī lagtī haiñ mujhe raushaniyāñ bhī

kuchh apnī kaho Dūbte tāroñ ko na dekho
shāyad na mile phir ye nashāt-e-guzarāñ bhī

sochā thā ki lūTūñ tirī furqat ke ḳhazīne
dekhā na gayā tere bichhaḌne kā samāñ bhī

kuchh dil bhī hai merā ġham-e-ayyām se bojhal
kuchh shaam kī dahlīz se uThtā hai dhuāñ bhī

kis ajnabī rah-rav ke ta.āqub meñ chalā hai
pā.egā na tū ret pe qadmoñ ke nishāñ bhī

kartā huuñ kabhī chashm-e-taḳhayyul se nazāra
hotā hai kabhī tujh pe mohabbat kā gumāñ bhī

tū hāsil-e-manzil bhī mirā rāh-numā bhī
tū mujh se gurezāñ bhī qarīb-e-rag-e-jāñ bhī

go husn ki surat hain meri samt rawan bhi
ek KHwab si lagti hain mujhe raushaniyan bhi

kuchh apni kaho Dubte taron ko na dekho
shayad na mile phir ye nashat-e-guzaran bhi

socha tha ki luTun teri furqat ke KHazine
dekha na gaya tere bichhaDne ka saman bhi

kuchh dil bhi hai mera gham-e-ayyam se bojhal
kuchh sham ki dahliz se uThta hai dhuan bhi

kis ajnabi rah-raw ke taaqub mein chala hai
paega na tu ret pe qadmon ke nishan bhi

karta hun kabhi chashm-e-taKHayyul se nazara
hota hai kabhi tujh pe mohabbat ka guman bhi

tu hasil-e-manzil bhi mera rah-numa bhi
tu mujh se gurezan bhi qarib-e-rag-e-jaan bhi


Source:

Leave a comment

+