dhuāñ sā phail gayā dil meñ shaam Dhalte hī
badal ga.e mire mausam tire badalte hī

simaTte phailte saa.e kalām karne lage
lahū meñ ḳhauf kā pahlā charāġh jalte hī

koī malūl sī ḳhushbū fazā meñ tair ga.ī
kisī ḳhayāl ke harf-o-sadā meñ Dhalte hī

vo dost thā ki adū maiñ ne sirf ye jaanā
ki vo zamīn pe aayā mire sambhalte hī

badan kī aag ne lafzoñ ko phir se zinda kiyā
hurūf sabz hue barf ke pighalte hī

vo habs thā ki tarastī thī saañs lene ko
so ruuh taaza huī jism se nikalte hī

dhuan sa phail gaya dil mein sham Dhalte hi
badal gae mere mausam tere badalte hi

simaTte phailte sae kalam karne lage
lahu mein KHauf ka pahla charagh jalte hi

koi malul si KHushbu faza mein tair gai
kisi KHayal ke harf-o-sada mein Dhalte hi

wo dost tha ki adu main ne sirf ye jaana
ki wo zamin pe aaya mere sambhalte hi

badan ki aag ne lafzon ko phir se zinda kiya
huruf sabz hue barf ke pighalte hi

wo habs tha ki tarasti thi sans lene ko
so ruh taza hui jism se nikalte hi

Source: Funoon(Jadeed Ghazal Number: Volume-002)