safar kā silsila āḳhir kahāñ tamām karūñ
kahāñ charāġh chalā.ūñ kahāñ qayām karūñ

sabhī ke sar pe hai rakkhī kulāh naḳhvat kī
qadoñ kī bhiiḌ meñ kis kis kā ehtirām karūñ

haiñ jitne mohre yahāñ saare piTne vaale haiñ
kise maiñ shah karūñ apnā kise ġhulām karūñ

ajiib shahr hai koī suḳhan-shanās nahīñ
matā-e-fikr maiñ mansūb kis ke naam karūñ

mirā shanāsā hai koī na ham-zabāñ hai koī
dayār-e-ġhair meñ phir kis se maiñ kalām karūñ

sajā.ūñ us ke liye ghar bichhā.ūñ palkeñ 'zafar'
vo aa rahā hai to kuchh maiñ bhī ehtimām karūñ

safar ka silsila aaKHir kahan tamam karun
kahan charagh chalaun kahan qayam karun

sabhi ke sar pe hai rakkhi kulah naKHwat ki
qadon ki bhiD mein kis kis ka ehtiram karun

hain jitne mohre yahan sare piTne wale hain
kise main shah karun apna kise ghulam karun

ajib shahr hai koi suKHan-shanas nahin
mata-e-fikr main mansub kis ke nam karun

mera shanasa hai koi na ham-zaban hai koi
dayar-e-ghair mein phir kis se main kalam karun

sajaun us ke liye ghar bichhaun palken 'zafar'
wo aa raha hai to kuchh main bhi ehtimam karun