bādshāhī ho ki daryūza-garī kā mausam
bhūltā hī nahīñ vo ham-safarī kā mausam

khetiyāñ chhāloñ kī hotī thiiñ lahū ugte the
kitnā zarḳhez thā vo dar-badarī kā mausam

hirz-e-jāñ Thahre jo sahrā meñ Thikāna mil jaa.e
bastiyoñ meñ to hai āshufta-sarī kā mausam

aao zaḳhmoñ se phir ik baar lipaT kar ro leñ
varna aane ko hai ab baḳhiya-garī kā mausam

roz-e-avval se hai chhāyā huā mujh par ab tak
kirchiyāñ hone kā shaqq-ul-basharī kā mausam

ab kabhī lauT kar aa.egā na shāyad 'ājiz'
Duub kar piine kā dāman kī tarī kā mausam

baadshahi ho ki daryuza-gari ka mausam
bhulta hi nahin wo ham-safari ka mausam

khetiyan chhaalon ki hoti thin lahu ugte the
kitna zarKHez tha wo dar-badari ka mausam

hirz-e-jaan Thahre jo sahra mein Thikana mil jae
bastiyon mein to hai aashufta-sari ka mausam

aao zaKHmon se phir ek bar lipaT kar ro len
warna aane ko hai ab baKHiya-gari ka mausam

roz-e-awwal se hai chhaya hua mujh par ab tak
kirchiyan hone ka shaqq-ul-bashari ka mausam

ab kabhi lauT kar aaega na shayad 'ajiz'
Dub kar pine ka daman ki tari ka mausam