Subscribe to our newsletter and get our newest updates

Etibar Sajid

  • Ghazal


chhoTe chhoTe kai be-faiz mafadat ke sath


chhoTe chhoTe ka.ī be-faiz mafādāt ke saath
log zinda haiñ ajab sūrat-e-hālāt ke saath

faisla ye to bahar-hāl tujhe karnā hai
zehn ke saath sulagnā hai ki jazbāt ke saath

guftugū der se jaarī hai natīje ke baġhair
ik na.ī baat nikal aatī hai har baat ke saath

ab ke ye soch ke tum zaḳhm-e-judā.ī denā
dil bhī bujh jā.egā Dhaltī huī is raat ke saath

tum vahī ho ki jo pahle the mirī nazroñ meñ
kyā izāfa huā in atlas o bānāt ke saath

itnā paspā na ho dīvār se lag jā.egā
itne samjhaute na kar sūrat-e-hālāt ke saath

bhejtā rahtā hai gum-nām ḳhatoñ meñ kuchh phuul
is qadar kis ko mohabbat hai mirī zaat ke saath

chhoTe chhoTe kai be-faiz mafadat ke sath
log zinda hain ajab surat-e-haalat ke sath

faisla ye to bahar-haal tujhe karna hai
zehn ke sath sulagna hai ki jazbaat ke sath

guftugu der se jari hai natije ke baghair
ek nai baat nikal aati hai har baat ke sath

ab ke ye soch ke tum zaKHm-e-judai dena
dil bhi bujh jaega Dhalti hui is raat ke sath

tum wahi ho ki jo pahle the meri nazron mein
kya izafa hua in atlas o banat ke sath

itna paspa na ho diwar se lag jaega
itne samjhaute na kar surat-e-haalat ke sath

bhejta rahta hai gum-nam KHaton mein kuchh phul
is qadar kis ko mohabbat hai meri zat ke sath

Videos
This video is playing from YouTube Videos
This video is playing from YouTube Unknown

Source: Intikhab Apna Apna

Leave a comment

+