Subscribe to our newsletter and get our newest updates

Chandra Parkash Shad

  • Ghazal


badan ko apni bisat tak to pasarna tha


badan ko apnī bisāt tak to pasārnā thā
har ek shai ko lahū ke raste guzārnā thā

jidhar fasīloñ ne us ko moḌā ye muḌ ga.ī hai
havā kī maujoñ meñ koī kauñdā utārnā thā

to kyā sabab saat pāniyoñ ko na pī sake ham
ḳhud apnā Duubā huā jazīra ubhārnā thā

maiñ apne andar simaT gayā ek lamha ban kar
kahīñ to apne janam kā manzar guzārnā thā

tum aa ga.e kyuuñ vajūd kī ye barāt le kar
hameñ to apnī ragoñ meñ shamshān utārnā thā

yahāñ se kaT kar vo jā ke jañgal meñ so ga.ī haiñ
usī bahāne havāoñ ko khel hārnā thā

na brij TuuTe na aañkh jhapkī na vaqt biitā
na jaane kyā kuchh bisarnā thā kyā bisārnā thā

badan ko apni bisat tak to pasarna tha
har ek shai ko lahu ke raste guzarna tha

jidhar fasilon ne us ko moDa ye muD gai hai
hawa ki maujon mein koi kaunda utarna tha

to kya sabab sat paniyon ko na pi sake hum
KHud apna Duba hua jazira ubhaarna tha

main apne andar simaT gaya ek lamha ban kar
kahin to apne janam ka manzar guzarna tha

tum aa gae kyun wajud ki ye baraat le kar
hamein to apni ragon mein shamshan utarna tha

yahan se kaT kar wo ja ke jangal mein so gai hain
usi bahane hawaon ko khel haarna tha

na brij TuTe na aankh jhapki na waqt bita
na jaane kya kuchh bisarna tha kya bisarna tha


Pachas Sala Intekhab"

Leave a comment

+