Subscribe to our newsletter and get our newest updates

Zaheer Dehlvi

  • Ghazal


phaTa paDta hai joban aur josh-e-nau-jawani hai


phaTā paḌtā hai joban aur josh-e-nau-javānī hai
vo ab to ḳhud-ba-ḳhud jaame se bāhar hote jaate haiñ

nazar hotī hai jitnī un ko apne husn-e-sūrat par
sitamgar be-muravvat kīna-parvar hote jaate haiñ

bhalā is husn-e-zebā.ī kā un ke kyā Thikānā hai
ki jitne aib haiñ duniyā meñ zevar hote jaate haiñ

abhī hai taaza taaza shauq-e-ḳhud-bīnī abhī kyā hai
abhī vo ḳhair se naḳhvat ke ḳhūgar hote jaate haiñ

vo yuuñ bhī māh-e-tal.at haiñ magar shoḳhī qayāmat hai
ki jitne bad-maza hote haiñ ḳhush-tar hote jaate haiñ

phaTa paDta hai joban aur josh-e-nau-jawani hai
wo ab to KHud-ba-KHud jame se bahar hote jate hain

nazar hoti hai jitni un ko apne husn-e-surat par
sitamgar be-murawwat kina-parwar hote jate hain

bhala is husn-e-zebai ka un ke kya Thikana hai
ki jitne aib hain duniya mein zewar hote jate hain

abhi hai taza taza shauq-e-KHud-bini abhi kya hai
abhi wo KHair se naKHwat ke KHugar hote jate hain

wo yun bhi mah-e-talat hain magar shoKHi qayamat hai
ki jitne bad-maza hote hain KHush-tar hote jate hain

RECITATIONS Fasih Akmal



00:00/00:00 phaTa paDta hai joban aur josh-e-nau-jawani hai Fasih Akmal

Source: Funoon(Jadeed Ghazal Number: Volume-002)

Leave a comment

+