Subscribe to our newsletter and get our newest updates

Tanveer Ahmad Alvi

  • Ghazal


kamand-e-halqa-e-guftar toD di maine


kamand-e-halqa-e-guftār toḌ dī maiñ ne
ki mohr-e-dast-e-qalamkār toḌ dī maiñ ne

rivāyatoñ ko salīboñ se kar diyā āzād
yahī rasan to sar-e-dār toḌ dī maiñ ne

ye mere haath haiñ aur be-shanāḳht ab bhī nahīñ
ye aur baat hai talvār toḌ dī maiñ ne

safīne hī ko maiñ sho.ala dikhā ke niklā thā
jo apne haath se patvār toḌ dī maiñ ne

tahakkumāna adā aur faisle dil ke
kamān-e-ābru-e-ḳham-dār toḌ dī maiñ ne

girah girah jo kahīñ aur rishta rishta kahīñ
ye rasm-e-sub.ha-o-zunnār toḌ dī maiñ ne

vo dā.eroñ se jo bāhar na aa sake 'tanvīr'
vo rasm-e-gardish-e-parkār toḌ dī maiñ ne

kamand-e-halqa-e-guftar toD di main ne
ki mohr-e-dast-e-qalamkar toD di main ne

riwayaton ko salibon se kar diya aazad
yahi rasan to sar-e-dar toD di main ne

ye mere hath hain aur be-shanaKHt ab bhi nahin
ye aur baat hai talwar toD di main ne

safine hi ko main shoala dikha ke nikla tha
jo apne hath se patwar toD di main ne

tahakkumana ada aur faisle dil ke
kaman-e-abru-e-KHam-dar toD di main ne

girah girah jo kahin aur rishta rishta kahin
ye rasm-e-subha-o-zunnar toD di main ne

wo daeron se jo bahar na aa sake 'tanwir'
wo rasm-e-gardish-e-parkar toD di main ne


Leave a comment

+