zikr ham se be-talab kā kyā talabgārī ke din
tum hameñ sochoge ik din ḳhud se be-zārī ke din

munhamik masrūf ek ik kaam nimTāte hue
saaf se raushan se ye chalne kī tayyārī ke din

roz ik bujhtī huī sīlan bhare kamre kī shaam
khiḌkiyoñ meñ roz murjhāte ye bīmārī ke din

nam nashīlī sā.atoñ kī sard zahrīlī sī raat
ḳhvāb hote jā rahe hoñ jaise bedārī ke din

hāfize kī sust-rau lahroñ meñ halchal kyā huī
jaag uTThe dhaḌkanoñ kī tez-raftārī ke din

zehan ke sahrā meñ uThtā ik bagūla sā kabhī
gaahe gaahe kār-āmad se ye bekārī ke din

dam-ba-dam tahlīl sā hotā huā manzar kā bojh
sahl se hote hue palkoñ pe dushvārī ke din

umr ke bāzār kī had par navādir kī dukāñ
kuchh parakhte dekhte chunte ḳharīdārī ke din

rah ga.ī kāġhaz pe khiñch kar lafz se aarī lakīr
'sāz' shāyad bhar ga.e haiñ ab mire qaarī ke din

zikr hum se be-talab ka kya talabgari ke din
tum hamein sochoge ek din KHud se be-zari ke din

munhamik masruf ek ek kaam nimTate hue
saf se raushan se ye chalne ki tayyari ke din

roz ek bujhti hui silan bhare kamre ki sham
khiDkiyon mein roz murjhate ye bimari ke din

nam nashili saaton ki sard zahrili si raat
KHwab hote ja rahe hon jaise bedari ke din

hafize ki sust-rau lahron mein halchal kya hui
jag uTThe dhaDkanon ki tez-raftari ke din

zehan ke sahra mein uThta ek bagula sa kabhi
gahe gahe kar-amad se ye bekari ke din

dam-ba-dam tahlil sa hota hua manzar ka bojh
sahl se hote hue palkon pe dushwari ke din

umr ke bazar ki had par nawadir ki dukan
kuchh parakhte dekhte chunte KHaridari ke din

rah gai kaghaz pe khinch kar lafz se aari lakir
'saz' shayad bhar gae hain ab mere qari ke din

Source: Rooh-e-Ghazal,Pachas Sala Intekhab