kyā haiñ shaidā-e-qadd-e-yār daraḳht
haiñ jo shabnam se ashk-bār daraḳht

dekheñ gar sarv-qad-e-yār daraḳht
ḳhaak par loTeñ sāya-dār daraḳht

ashk-bār un pe haiñ jo murġh-e-chaman
pahne haiñ motiyoñ kā haar daraḳht

sar-kashī kī hai kyā tire qad se
kaaTe jaate haiñ be-shumār daraḳht

kyā tire qad se duuñ misāl use
ki hai añgusht zīnhār daraḳht

tire jalve se naḳhl-e-tūr bane
haiñ jo bālā-e-kohsār daraḳht

bed-e-majnūñ ko dekh o lailā
hai ye majnūñ kā yādgār daraḳht

dekh kar tujh ko bhuul jā.eñge
gul khilā.enge be-bahār daraḳht

zindagī meñ na maiñ ne phal paayā
ho na mere sar-e-mazār daraḳht

fā.eda bhī yahāñ to nuqsāñ hai
sañg khāte haiñ bār-dār daraḳht

dāġh-e-tan khil rahe haiñ sūrat-e-gul
ham haiñ goyā shagūfa-dār daraḳht

kya hain shaida-e-qadd-e-yar daraKHt
hain jo shabnam se ashk-bar daraKHt

dekhen gar sarw-qad-e-yar daraKHt
KHak par loTen saya-dar daraKHt

ashk-bar un pe hain jo murgh-e-chaman
pahne hain motiyon ka haar daraKHt

sar-kashi ki hai kya tere qad se
kaTe jate hain be-shumar daraKHt

kya tere qad se dun misal use
ki hai angusht zinhaar daraKHt

tere jalwe se naKHl-e-tur bane
hain jo baala-e-kohsar daraKHt

bed-e-majnun ko dekh o laila
hai ye majnun ka yaadgar daraKHt

dekh kar tujh ko bhul jaenge
gul khilaenge be-bahaar daraKHt

zindagi mein na main ne phal paya
ho na mere sar-e-mazar daraKHt

faeda bhi yahan to nuqsan hai
sang khate hain bar-dar daraKHt

dagh-e-tan khil rahe hain surat-e-gul
hum hain goya shagufa-dar daraKHt

Source: Book : Dawat-e-Sang (Pg. 59) Author : Jafar Abbas Publication : Guftagu Publications (2017) Edition : 2017