ham jo mil baiTheñ to yak-jān bhī ho sakte haiñ
puure apne sabhī armān bhī ho sakte haiñ

tujh se is tarah pe aa pahuñchā hai rishta apnā
bin bulā.e tire mehmān bhī ho sakte haiñ

ham tire naam kī japte nahīñ maalā hī faqat
ham tire naam pe qurbān bhī ho sakte haiñ

dil meñ aane kī bhalā aap ko dāvat maiñ duuñ
ghar ke mālik kabhī mehmān bhī ho sakte haiñ

but-e-kāfir kī parastish pe koī qaid nahīñ
pūjne vaale musalmān bhī ho sakte haiñ

be-ruḳhī tū ne bhī bartī jo ḳhudāyā un se
tujh se barham tire insān bhī ho sakte haiñ

aaj jo gardish-e-daurāñ kā uḌāte haiñ mazāq
kal vahī log pareshān bhī ho sakte haiñ

tū jo samjhe mire armānoñ kī ahmiyyat ko
mere armāñ tire armān bhī ho sakte haiñ

jab ḳhatā karte the us vaqt na sochā ai 'charḳh'
ham sar-e-hashr pashemān bhī ho sakte haiñ

hum jo mil baiThen to yak-jaan bhi ho sakte hain
pure apne sabhi arman bhi ho sakte hain

tujh se is tarah pe aa pahuncha hai rishta apna
bin bulae tere mehman bhi ho sakte hain

hum tere nam ki japte nahin mala hi faqat
hum tere nam pe qurban bhi ho sakte hain

dil mein aane ki bhala aap ko dawat main dun
ghar ke malik kabhi mehman bhi ho sakte hain

but-e-kafir ki parastish pe koi qaid nahin
pujne wale musalman bhi ho sakte hain

be-ruKHi tu ne bhi barti jo KHudaya un se
tujh se barham tere insan bhi ho sakte hain

aaj jo gardish-e-dauran ka uDate hain mazaq
kal wahi log pareshan bhi ho sakte hain

tu jo samjhe mere armanon ki ahmiyyat ko
mere arman tere arman bhi ho sakte hain

jab KHata karte the us waqt na socha ai 'charKH'
hum sar-e-hashr pasheman bhi ho sakte hain

Source: Book : Ehsasat-e-Farigh (Pg. 104) Author : Laxmi Narayan Farigh