be-talab ek qadam ghar se na bāhar jā.ūñ
varna maiñ phāñd ke hī saat samundar jā.ūñ

dāstāneñ haiñ makānoñ kī zabānoñ pe raqam
paḌh sakūñ maiñ to makānoñ se bayāñ kar jā.ūñ

maiñ munazzim se bhalā kaise karūñ samjhautā
Dūbne vaale sitāroñ se maiñ kyuuñ Dar jā.ūñ

ruuh kyā aa.e nazar jism kī dīvāroñ meñ
in ko Dhā.ūñ to us ā.īne ke andar jā.ūñ

aur do chaar masā.ib kī kasar baaqī hai
ye uThā lā.ūñ to maiñ duniyā ke safar par jā.ūñ

zahr hai mere rag-o-pai meñ mohabbat shāyad
apne hī Dañk se bichchhū kī tarah mar jā.ūñ

thak ke patthar kī tarah baiThā huuñ raste meñ 'zafar'
jaane kab uTh sakūñ kyā jāniye kab ghar jā.ūñ

be-talab ek qadam ghar se na bahar jaun
warna main phand ke hi sat samundar jaun

dastanen hain makanon ki zabanon pe raqam
paDh sakun main to makanon se bayan kar jaun

main munazzim se bhala kaise karun samjhauta
Dubne wale sitaron se main kyun Dar jaun

ruh kya aae nazar jism ki diwaron mein
in ko Dhaun to us aaine ke andar jaun

aur do chaar masaib ki kasar baqi hai
ye uTha laun to main duniya ke safar par jaun

zahr hai mere rag-o-pai mein mohabbat shayad
apne hi Dank se bichchhu ki tarah mar jaun

thak ke patthar ki tarah baiTha hun raste mein 'zafar'
jaane kab uTh sakun kya jaaniye kab ghar jaun