kahīñ to aa ke ruke bhī musāfirī merī
ki mujh ko DhūñDhtī rahtī hai be-gharī merī
maiñ jis ke vāste ḳhud ko bhulā.e baiThā huuñ
usī ko bhuul na jaa.e ye sādgī merī
kabhī bhī khul ke kisī se kalām kar na sakā
tamām umr fazā hī thī ajnabī merī
hai raushnī kā havāla parāyā des magar
taras rahī hai ujāloñ ko zindagī merī
bas ik tamannā sī rahtī hai jo satātī hai
yahī ki tujh ko pasand aa.e shā.irī merī
vafā kī raah ko is taur se kiyā raushan
ki yaad aa.egī duniyā ko āshiqī merī
kahin to aa ke ruke bhi musafiri meri
ki mujh ko DhunDhti rahti hai be-ghari meri
main jis ke waste KHud ko bhulae baiTha hun
usi ko bhul na jae ye sadgi meri
kabhi bhi khul ke kisi se kalam kar na saka
tamam umr faza hi thi ajnabi meri
hai raushni ka hawala paraya des magar
taras rahi hai ujalon ko zindagi meri
bas ek tamanna si rahti hai jo satati hai
yahi ki tujh ko pasand aae shairi meri
wafa ki rah ko is taur se kiya raushan
ki yaad aaegi duniya ko aashiqi meri
Leave a comment