but-kade meñ na tujhe kaabe ke andar paayā
donoñ aalam se judā ham ne tirā ghar paayā

yuuñ to duniyā meñ qayāmat ke parī-rū dekhe
sab se baḌh kar tujhe ai fitna-e-mahshar paayā

apnī apnī hai ye taqdīr sabhī the saa.il
ek ko shīsha milā ek ne patthar paayā

be-ḳhudī ne mujhe dīdār dikhāyā terā
tujh ko paayā to magar aap ko kho kar paayā

chashma-e-faiz hai kyā zaat mire saaqī kī
ek qatre ko kahā jis ne samundar paayā

ḳhush-nasīb aap bhī duniyā meñ haiñ kyā ai 'jauhar'
muntazir yaar ko pahle hī se dar par paayā

but-kade mein na tujhe kabe ke andar paya
donon aalam se juda hum ne tera ghar paya

yun to duniya mein qayamat ke pari-ru dekhe
sab se baDh kar tujhe ai fitna-e-mahshar paya

apni apni hai ye taqdir sabhi the sail
ek ko shisha mila ek ne patthar paya

be-KHudi ne mujhe didar dikhaya tera
tujh ko paya to magar aap ko kho kar paya

chashma-e-faiz hai kya zat mere saqi ki
ek qatre ko kaha jis ne samundar paya

KHush-nasib aap bhi duniya mein hain kya ai 'jauhar'
muntazir yar ko pahle hi se dar par paya

RECITATIONS Fasih Akmal



00:00/00:00 but-kade mein na tujhe kabe ke andar paya Fasih Akmal