nigāh-e-nāz kā hāsil hai e'tibār mujhe
havā-e-shauq zarā aur bhī nikhār mujhe

kabhī zabāñ na khulī arz-e-mudda.ā ke liye
kiyā hai pās-e-adab ne bhī sharmsār mujhe

purāne zaḳhm na.e daaġh saath saath rahe
milī to kaisī milī da.avat-e-bahār mujhe

phir ahl-e-hosh ke narġhe meñ aa gayā huuñ maiñ
ḳhudā ke vāste ik baar phir pukār mujhe

bikhar rahī hai mohabbat kī raushnī har sū
uḌā rahā hai koī sūrat-e-ġhubār mujhe

na jaane kaun sā hai sho.abada ta.āqub meñ
ki aaj us ne kahā hai vafā shi.ār mujhe

jo aap aa.eñ to ye faisla bhī ho jaa.e
dikhā.ī detā hai mausam to ḳhush-gavār mujhe

hazār baar sukūn-e-hayāt kī had meñ
hazār baar kiyā dil ne be-qarār mujhe

mire shabāb mirī zindagī mire maazī
zabān-e-hāl se ik baar phir pukār mujhe

vo baat jis pe madār-e-vafā hai 'yazdānī'
vo baat kahnā paḌegī huzūr-e-yār mujhe

nigah-e-naz ka hasil hai e'tibar mujhe
hawa-e-shauq zara aur bhi nikhaar mujhe

kabhi zaban na khuli arz-e-muddaa ke liye
kiya hai pas-e-adab ne bhi sharmsar mujhe

purane zaKHm nae dagh sath sath rahe
mili to kaisi mili dawat-e-bahaar mujhe

phir ahl-e-hosh ke narghe mein aa gaya hun main
KHuda ke waste ek bar phir pukar mujhe

bikhar rahi hai mohabbat ki raushni har su
uDa raha hai koi surat-e-ghubar mujhe

na jaane kaun sa hai shoabada taaqub mein
ki aaj us ne kaha hai wafa shiar mujhe

jo aap aaen to ye faisla bhi ho jae
dikhai deta hai mausam to KHush-gawar mujhe

hazar bar sukun-e-hayat ki had mein
hazar bar kiya dil ne be-qarar mujhe

mere shabab meri zindagi mere mazi
zaban-e-haal se ek bar phir pukar mujhe

wo baat jis pe madar-e-wafa hai 'yazdani'
wo baat kahna paDegi huzur-e-yar mujhe