Subscribe to our newsletter and get our newest updates

Waheed Allahabadi

  • Ghazal


tujh mein to ek KHu-e-jafa aur ho gai


tujh meñ to ek ḳhū-e-jafā aur ho ga.ī
maiñ aur ho gayā na vafā aur ho ga.ī

gul kā kahīñ nishāñ hai na bulbul kā zikr hai
do roz meñ chaman kī havā aur ho ga.ī

aamad kī sun ke kholī thī bīmār-e-ġham ne aañkh
tum aa ga.e umīd-e-shifā aur ho ga.ī

bint-e-inab to rindoñ ko yūñhī mubāh thī
zāhid nazar paḌā to ravā aur ho ga.ī

shakl-e-qubūl ho ke phirī āsmān se
tāsīr ho ga.ī to duā aur ho ga.ī

yaad aa ga.ī jo ka.abe meñ aabrū kī ai 'vahīd'
apnī namāz-e-ishq adā aur ho ga.ī

tujh mein to ek KHu-e-jafa aur ho gai
main aur ho gaya na wafa aur ho gai

gul ka kahin nishan hai na bulbul ka zikr hai
do roz mein chaman ki hawa aur ho gai

aamad ki sun ke kholi thi bimar-e-gham ne aankh
tum aa gae umid-e-shifa aur ho gai

bint-e-inab to rindon ko yunhi mubah thi
zahid nazar paDa to rawa aur ho gai

shakl-e-qubul ho ke phiri aasman se
tasir ho gai to dua aur ho gai

yaad aa gai jo kabe mein aabru ki ai 'wahid'
apni namaz-e-ishq ada aur ho gai


Leave a comment

+