Subscribe to our newsletter and get our newest updates

Lala Madhav Ram Jauhar

  • Ghazal


dil jab se tere hijr mein bimar paDa hai


dil jab se tire hijr meñ bīmār paḌā hai
jiine se ḳhafā jaan se be-zār paḌā hai

saudā na banā gesū-e-jānāñ se to kyā ġham
le leñge kahīñ aur se bāzār paḌā hai

parhez tap-e-hijr se hai tujh ko jo ai dil
tū aur bhī aage kabhī bīmār paḌā hai

farmā.iye roke se ruke haiñ kabhī āshiq
darvāze pe qufl aap ke sau baar paḌā hai

maiñ dair o haram ho ke tire kūche meñ pahuñchā
do manziloñ kā pher bas ai yaar paḌā hai

kī tark-e-mohabbat to liyā dard-e-jigar mol
parhez se dil aur bhī bīmār paḌā hai

tauqīr nahīñ anjuman-e-ḳhās meñ dil kī
shīsha tire mai-ḳhāna meñ bekār paḌā hai

kuchh shām-e-judā.ī meñ sujhā.ī nahīñ detā
parda ḳhirad o hosh pe ai yaar paḌā hai

'jauhar' kahīñ biktī hī nahīñ jins-e-mohabbat
kyā qaht vafā kā sar-e-bāzār paḌā hai

dil jab se tere hijr mein bimar paDa hai
jine se KHafa jaan se be-zar paDa hai

sauda na bana gesu-e-jaanan se to kya gham
le lenge kahin aur se bazar paDa hai

parhez tap-e-hijr se hai tujh ko jo ai dil
tu aur bhi aage kabhi bimar paDa hai

farmaiye roke se ruke hain kabhi aashiq
darwaze pe qufl aap ke sau bar paDa hai

main dair o haram ho ke tere kuche mein pahuncha
do manzilon ka pher bas ai yar paDa hai

ki tark-e-mohabbat to liya dard-e-jigar mol
parhez se dil aur bhi bimar paDa hai

tauqir nahin anjuman-e-KHas mein dil ki
shisha tere mai-KHana mein bekar paDa hai

kuchh sham-e-judai mein sujhai nahin deta
parda KHirad o hosh pe ai yar paDa hai

'jauhar' kahin bikti hi nahin jins-e-mohabbat
kya qaht wafa ka sar-e-bazar paDa hai


Leave a comment

+