Subscribe to our newsletter and get our newest updates

Tanveer Ahmad Alvi

  • Ghazal


zehn zinda hai magar apne sawalat ke sath


zehn zinda hai magar apne savālāt ke saath
kitne uljhāo haiñ zanjīr-e-rivāyāt ke saath

kaun dekhegā yahāñ din ke ujāloñ kā sitam
ye sitāre to chale jā.eñge sab raat ke saath

jaane kis moḌ pe manzil kā pata bhuul ga.e
ham ki chalte hī rahe gardish-e-hālāt ke saath

vaqt kartā hai bhalā kis se yahāñ husn-e-sulūk
vo bhī is daur meñ qānūn-e-makāfāt ke saath

vo to ḳhanjar thā gale jis ne lagāyā ham ko
varna pesh aatā hai ab kaun mudārāt ke saath

hādse haiñ to unheñ pesh bhī aanā hai zarūr
vo bhī us shoḳh se taqrīb-e-mulāqāt ke saath

kaun suntā hai yahāñ dil kī kahānī 'tanvīr'
vo bhī ḳhushbūoñ ke mauhūm ishārāt ke saath

zehn zinda hai magar apne sawalat ke sath
kitne uljhao hain zanjir-e-riwayat ke sath

kaun dekhega yahan din ke ujalon ka sitam
ye sitare to chale jaenge sab raat ke sath

jaane kis moD pe manzil ka pata bhul gae
hum ki chalte hi rahe gardish-e-haalat ke sath

waqt karta hai bhala kis se yahan husn-e-suluk
wo bhi is daur mein qanun-e-makafat ke sath

wo to KHanjar tha gale jis ne lagaya hum ko
warna pesh aata hai ab kaun mudaraat ke sath

hadse hain to unhen pesh bhi aana hai zarur
wo bhi us shoKH se taqrib-e-mulaqat ke sath

kaun sunta hai yahan dil ki kahani 'tanwir'
wo bhi KHushbuon ke mauhum ishaaraat ke sath


Pachas Sala Intekhab"

Leave a comment

+