rāteñ guzārne ko tirī rahguzar ke saath
ghar se nikal paḌā huuñ maiñ dīvār-o-dar ke saath

dastak ne aisā hashr uThāyā ki der tak
larzāñ rahā hai jism bhī zanjīr dar ke saath

kashkol thāmte haiñ kaf-e-e.atibār se
karte haiñ ham gadāgarī lekin hunar ke saath

ab kis tarah ye Tokarī sar pe uThā.ūñ maiñ
sūraj paḌā huā hai mire bām-o-dar ke saath

sūraj usī tarah hai ye mahtāb usī tarah
Dhalte rahe haiñ yaar hī shām-o-sahar ke saath

yuuñ hai mirī uḌaan pe bhārī mirā vajūd
jaise zamīñ bañdhī ho mire bāl-o-par ke saath

'tābish' mujhe safar kī rivāyat kā paas thā
so maiñ bhī rah banā ke chalā rahguzar ke saath

raaten guzarne ko teri rahguzar ke sath
ghar se nikal paDa hun main diwar-o-dar ke sath

dastak ne aisa hashr uThaya ki der tak
larzan raha hai jism bhi zanjir dar ke sath

kashkol thamte hain kaf-e-eatibar se
karte hain hum gadagari lekin hunar ke sath

ab kis tarah ye Tokari sar pe uThaun main
suraj paDa hua hai mere baam-o-dar ke sath

suraj usi tarah hai ye mahtab usi tarah
Dhalte rahe hain yar hi sham-o-sahar ke sath

yun hai meri uDan pe bhaari mera wajud
jaise zamin bandhi ho mere baal-o-par ke sath

'tabish' mujhe safar ki riwayat ka pas tha
so main bhi rah bana ke chala rahguzar ke sath

Source: Deewan-e-Matam