Subscribe to our newsletter and get our newest updates

Obaidurrahman Niyazi

  • Ghazal


jo meri ruh ki gahraiyon mein utra tha


jo merī ruuh kī gahrā.iyoñ meñ utrā thā
vo ek narm mulā.em havā kā jhoñkā thā

us ek lams ke baare meñ kyā batā.ūñ tumheñ
ThiThurtī sardiyoñ kī tez dhuup jaisā thā

maiñ ik zamīn banā ghūmtā thā jis ke sabab
vo ek gul thā mire chāñd par jo khiltā thā

vo ek baaġh thā jis meñ thiiñ do hasīñ jhīleñ
maiñ un ko dekhte hī Duub Duub jaatā thā

us ek qasr ko andar se jhāñkne kī talab
mirī nazar ne baḌā saḳht vaqt kaaTā thā

maiñ umr bhar ke liye ḳhud ko bhuul baiThā thā
koī pukār nahīñ thī vo ek nashsha thā

maiñ raushnī se milā thā bas itnā yaad rahā
phir us ke baad se chāroñ taraf añdherā thā

ye aur baat ki vo merā ho nahīñ paayā
ḳhudā ne us ko mire vāste hī bhejā thā

jo meri ruh ki gahraiyon mein utra tha
wo ek narm mulaem hawa ka jhonka tha

us ek lams ke bare mein kya bataun tumhein
ThiThurti sardiyon ki tez dhup jaisa tha

main ek zamin bana ghumta tha jis ke sabab
wo ek gul tha mere chand par jo khilta tha

wo ek bagh tha jis mein thin do hasin jhilen
main un ko dekhte hi Dub Dub jata tha

us ek qasr ko andar se jhankne ki talab
meri nazar ne baDa saKHt waqt kaTa tha

main umr bhar ke liye KHud ko bhul baiTha tha
koi pukar nahin thi wo ek nashsha tha

main raushni se mila tha bas itna yaad raha
phir us ke baad se chaaron taraf andhera tha

ye aur baat ki wo mera ho nahin paya
KHuda ne us ko mere waste hi bheja tha


Leave a comment

+