Subscribe to our newsletter and get our newest updates

Ummeed Fazli

  • Ghazal


kab tak is pyas ke sahra mein jhulaste jaen


kab tak is pyaas ke sahrā meñ jhulaste jaa.eñ
ab ye bādal jo uThe haiñ to baraste jaa.eñ

kaun batlā.e tumheñ kaise vo mausam haiñ ki jo
mujh se hī duur raheñ mujh meñ hī baste jaa.eñ

ham se āzād-mizājoñ pe ye uftād hai kyā
chāhte jaa.eñ use ḳhud ko taraste jaa.eñ

haa.e kyā log ye ābād hue haiñ mujh meñ
pyaar ke lafz likheñ lahje se Daste jaa.eñ

aa.ina dekhūñ to ik chehre ke be-rañg nuqūsh
ek nādīda sī zanjīr meñ kaste jaa.eñ

juz mohabbat kise aayā hai mayassar 'ummīd'
aisā lamha ki jidhar sadiyoñ ke raste jaa.eñ

kab tak is pyas ke sahra mein jhulaste jaen
ab ye baadal jo uThe hain to baraste jaen

kaun batlae tumhein kaise wo mausam hain ki jo
mujh se hi dur rahen mujh mein hi baste jaen

hum se aazad-mizajon pe ye uftad hai kya
chahte jaen use KHud ko taraste jaen

hae kya log ye aabaad hue hain mujh mein
pyar ke lafz likhen lahje se Daste jaen

aaina dekhun to ek chehre ke be-rang nuqush
ek nadida si zanjir mein kaste jaen

juz mohabbat kise aaya hai mayassar 'ummid'
aisa lamha ki jidhar sadiyon ke raste jaen


Source: Book : Seepiyon Ki Qaid men Author : Yaqoob Tasawwur Publication : Yaqoob Tasawwur

Leave a comment

+