Subscribe to our newsletter and get our newest updates

Basheer Ahmad Basheer

  • Ghazal


ji nahin lagta kitabon mein kitaben kya karen


jī nahīñ lagtā kitāboñ meñ kitābeñ kyā kareñ
kyā paḌheñ paḌh kar bujhī be-nūr satreñ kyā kareñ

kuchh ajab hālat hai ai dil kuchh samajh aatā nahīñ
so raheñ ghar jā ke yā galiyoñ meñ ghūmeñ kyā kareñ

vāsta patthar se paḌ jaa.e jahāñ sochūñ vahāñ
kyā kareñ zor-e-bayāñ qalameñ davāteñ kyā kareñ

aisī yaḳh-basta havā meñ koñpleñ phūTeñgī kyaa?
bārishoñ kī aarzū be-barg shāḳheñ kyā kareñ

ho ga.ī daldal zamīñ dhañste hī rah jaate haiñ yaañ
kyā kareñ mohkam binā.eñ surḳh īñTeñ kyā kareñ

shaam Dhalte hī ye aalam hai to kyā jaane bashīr
haal apnā sub.h tak be-rabt nabzeñ kyā kareñ

ji nahin lagta kitabon mein kitaben kya karen
kya paDhen paDh kar bujhi be-nur satren kya karen

kuchh ajab haalat hai ai dil kuchh samajh aata nahin
so rahen ghar ja ke ya galiyon mein ghumen kya karen

wasta patthar se paD jae jahan sochun wahan
kya karen zor-e-bayan qalamen dawaten kya karen

aisi yaKH-basta hawa mein konplen phuTengi kya?
barishon ki aarzu be-barg shaKHen kya karen

ho gai daldal zamin dhanste hi rah jate hain yan
kya karen mohkam binaen surKH inTen kya karen

sham Dhalte hi ye aalam hai to kya jaane bashir
haal apna subh tak be-rabt nabzen kya karen


Source: Book : Shab Charagh (Pg. 59) Author : Bakhtiyar Ziya Publication : Markaz-e-adab (1993) Edition : 1993

Leave a comment

+