maiñ ġharq vahāñ pyaas ke paikar kī tarah thā
har qatra jahāñ ek samundar kī tarah thā

ghar saare shikasta the guzar-gāheñ añdherī
kuchh shahr mirā mere muqaddar kī tarah thā

aaj us kā jahāñ meñ koī pursāñ hī nahīñ hai
kal tak jo zamāne meñ sikandar kī tarah thā

thā is ke muqaddar meñ likhā Dūbnā Duubā
hālāñki vo dariyā meñ shanāvar kī tarah thā

kyā merī haqīqat thī gulistāñ meñ na pūchho
maiñ thā magar ik tā.ir-e-be-par kī tarah thā

jab shahr meñ patthar hī kī thī umr gañvā.ī
duniyā meñ tujhe jiinā bhī aazar kī tarah thā

dil ke bhī zamāne meñ badalte rahe andāz
dariyā kī tarah thā kabhī patthar kī tarah thā

duniyā-e-adab meñ sabhī kahte haiñ jise 'mīr'
ik lafz-o-ma.ānī ke samundar kī tarah thā

raas aa.ī 'guhar' ḳhuub mujhe dasht-navardī
har ābla-e-pā mirā gauhar kī tarah thā

main gharq wahan pyas ke paikar ki tarah tha
har qatra jahan ek samundar ki tarah tha

ghar sare shikasta the guzar-gahen andheri
kuchh shahr mera mere muqaddar ki tarah tha

aaj us ka jahan mein koi pursan hi nahin hai
kal tak jo zamane mein sikandar ki tarah tha

tha is ke muqaddar mein likha Dubna Duba
haalanki wo dariya mein shanawar ki tarah tha

kya meri haqiqat thi gulistan mein na puchho
main tha magar ek tair-e-be-par ki tarah tha

jab shahr mein patthar hi ki thi umr ganwai
duniya mein tujhe jina bhi aazar ki tarah tha

dil ke bhi zamane mein badalte rahe andaz
dariya ki tarah tha kabhi patthar ki tarah tha

duniya-e-adab mein sabhi kahte hain jise 'mir'
ek lafz-o-maani ke samundar ki tarah tha

ras aai 'guhar' KHub mujhe dasht-nawardi
har aabla-e-pa mera gauhar ki tarah tha