Subscribe to our newsletter and get our newest updates

Osama Khalid

  • Ghazal


kuchh bholi aur kuchh tikhi aawazen hain


kuchh bholī aur kuchh tīkhī āvāzeñ haiñ
jaise chehre haiñ vaisī āvāzeñ haiñ

ik tathīr se aarī jism kā pursa haiñ
ḳhauf meñ lipTī jitnī bhī āvāzeñ haiñ

chāroñ-jānib ghor añdherā hai jis meñ
āThoñ jānib sunñe kī āvāzeñ haiñ

aisā mahv huuñ ḳhāmoshī ko sunñe meñ
maano mujh se pahle kī āvāzeñ haiñ

ghuur rahā huuñ kānoñ kī vīrānī ko
chīḳh rahā huuñ kyā gūñgī āvāzeñ haiñ

itnī vahshat taarī huī ki bhuul ga.e
ye to apnī imdādī āvāzeñ haiñ

chauñk rahā huuñ mere vīrāñ kamre meñ
koī nahīñ hai phir kaisī āvāzeñ haiñ

āvāzoñ kā jamnā is se sābit hai
jaise ham ḳhāmoshī kī āvāzeñ haiñ

dost hamāre paas izāfī kuchh bhī nahīñ
martī siskiyāñ haiñ dabtī āvāzeñ haiñ

kuchh bholi aur kuchh tikhi aawazen hain
jaise chehre hain waisi aawazen hain

ek tathir se aari jism ka pursa hain
KHauf mein lipTi jitni bhi aawazen hain

chaaron-jaanib ghor andhera hai jis mein
aaThon jaanib sunne ki aawazen hain

aisa mahw hun KHamoshi ko sunne mein
mano mujh se pahle ki aawazen hain

ghur raha hun kanon ki virani ko
chiKH raha hun kya gungi aawazen hain

itni wahshat tari hui ki bhul gae
ye to apni imdadi aawazen hain

chaunk raha hun mere viran kamre mein
koi nahin hai phir kaisi aawazen hain

aawazon ka jamna is se sabit hai
jaise hum KHamoshi ki aawazen hain

dost hamare pas izafi kuchh bhi nahin
marti siskiyan hain dabti aawazen hain


Leave a comment

+