kahte ho ab mire mazlūm pe bedād na ho
sitam-ījād ho phir kyuuñ sitam ījād na ho

nahīñ paimān-e-vafā tum ne nahīñ bāñdhā thā
vo fasāna hī ġhalat hai jo tumheñ yaad na ho

tum ne dil ko mire kuchh aisā kiyā hai nāshād
shaad karnā bhī jo ab chāho to ye shaad na ho

jo giraftār tumhārā hai vahī hai āzād
jis ko āzād karo tum kabhī āzād na ho

merā maqsad ki vo ḳhush hoñ mirī ḳhāmoshī se
un ko andesha ki ye bhī koī fariyād na ho

maiñ na bhūlūñ ġham-e-ishq kā ehsāñ 'vahshat'
un ko paimān-e-mohabbat jo nahīñ yaad na ho

kahte ho ab mere mazlum pe bedad na ho
sitam-ijad ho phir kyun sitam ijad na ho

nahin paiman-e-wafa tum ne nahin bandha tha
wo fasana hi ghalat hai jo tumhein yaad na ho

tum ne dil ko mere kuchh aisa kiya hai nashad
shad karna bhi jo ab chaho to ye shad na ho

jo giraftar tumhaara hai wahi hai aazad
jis ko aazad karo tum kabhi aazad na ho

mera maqsad ki wo KHush hon meri KHamoshi se
un ko andesha ki ye bhi koi fariyaad na ho

main na bhulun gham-e-ishq ka ehsan 'wahshat'
un ko paiman-e-mohabbat jo nahin yaad na ho

RECITATIONS Nomaan Shauque



00:00/00:00 kahte ho ab mere mazlum pe bedad na ho Nomaan Shauque