sahar kā nuur hai tāroñ kā in.ikās nahīñ
fareb-ḳhurda ho tum yā ziyā-shanās nahīñ

jabīn-e-sub.h pe tahrīr hai ye ḳhatt-e-jalī
na.e nizām meñ tafrīq-e-ām-o-ḳhās nahīñ

ye kis vasūq se anvār-e-sub.h kahte haiñ
na.ī hayāt se koī bhī vaj.h-e-yās nahīñ

ye aur baat hai dil ḳhuun ho gayā ġham se
nazar meñ aap kī ab bhī koī udaas nahīñ

vo aur hoñge jinheñ zindagī ke aish mile
yahāñ to ek tabassum bhī ham ko raas nahīñ

fareb-o-kizb dariyā se maiñ be-ta.alluq huuñ
ba-juz ḳhulūs-o-vafā kuchh bhī mere paas nahīñ

'sa.īd' dost mile haiñ mujhe kuchh aise bhī
ki jin ko mehr-o-mohabbat kā koī paas nahīñ

sahar ka nur hai taron ka inikas nahin
fareb-KHurda ho tum ya ziya-shanas nahin

jabin-e-subh pe tahrir hai ye KHatt-e-jali
nae nizam mein tafriq-e-am-o-KHas nahin

ye kis wasuq se anwar-e-subh kahte hain
nai hayat se koi bhi wajh-e-yas nahin

ye aur baat hai dil KHun ho gaya gham se
nazar mein aap ki ab bhi koi udas nahin

wo aur honge jinhen zindagi ke aish mile
yahan to ek tabassum bhi hum ko ras nahin

fareb-o-kizb dariya se main be-talluq hun
ba-juz KHulus-o-wafa kuchh bhi mere pas nahin

'said' dost mile hain mujhe kuchh aise bhi
ki jin ko mehr-o-mohabbat ka koi pas nahin

Source: Deewan-e-Baqa