Subscribe to our newsletter and get our newest updates

Aazim Kohli

  • Ghazal


doston ki bazm mein saghar uThae jaenge


dostoñ kī bazm meñ sāġhar uThā.e jā.eñge
chāñdnī rātoñ ke qisse phir sunā.e jā.eñge

aaj maqtal meñ lagā hai sar-phiroñ kā ik hujūm
phir kisī qātil ke jauhar āzmā.e jā.eñge

zikr phir guzre zamānoñ kā vahāñ chhiḌ jā.egā
vaqt ke chehre se phir parde uThā.e jā.eñge

chal paḌegā phir bayāñ ik chāñd se ruḳhsār kā
yaad phir zulfoñ ke pech-o-ḳham dilā.e jā.eñge

baat chal niklegī phir iqrār kī inkār kī
phir vahī bachpan ke bhūle giit gaa.e jā.eñge

yaad ā.eñge fasāne yuuñ to sab ko bazm meñ
kuchh kaheñge aur kuchh bas muskurā.e jā.eñge

jo añdhere DhūñDhte haiñ muñh chhupāne ke liye
raushnī ke rū-ba-rū ik din vo laa.e jā.eñge

maut ne har bazm kī sūrat badal Daalī yahāñ
rah ga.e kuchh yaar so vo bhī uThā.e jā.eñge

aa chaleñ 'āzim' purāne dostoñ ke darmiyāñ
yaad kī bastī meñ phir kuchh gul khilā.e jā.eñge

doston ki bazm mein saghar uThae jaenge
chandni raaton ke qisse phir sunae jaenge

aaj maqtal mein laga hai sar-phiron ka ek hujum
phir kisi qatil ke jauhar aazmae jaenge

zikr phir guzre zamanon ka wahan chhiD jaega
waqt ke chehre se phir parde uThae jaenge

chal paDega phir bayan ek chand se ruKHsar ka
yaad phir zulfon ke pech-o-KHam dilae jaenge

baat chal niklegi phir iqrar ki inkar ki
phir wahi bachpan ke bhule git gae jaenge

yaad aaenge fasane yun to sab ko bazm mein
kuchh kahenge aur kuchh bas muskurae jaenge

jo andhere DhunDhte hain munh chhupane ke liye
raushni ke ru-ba-ru ek din wo lae jaenge

maut ne har bazm ki surat badal Dali yahan
rah gae kuchh yar so wo bhi uThae jaenge

aa chalen 'azim' purane doston ke darmiyan
yaad ki basti mein phir kuchh gul khilae jaenge


Leave a comment

+