ye kaun chhoḌ gayā us pe ḳhāmiyāñ apnī
mujhe dikhātā hai ā.īna jhurriyāñ apnī

banā ke chhāp lo tum un ko surḳhiyāñ apnī
kueñ meñ pheñk dī ham ne to nekiyāñ apnī

badalte vaqt ki raftār thāmte haiñ huzūr
badalte rahte haiñ aksar jo Topiyāñ apnī

qatāreñ dekh ke lambī hazāroñ logoñ kī
maiñ phaaḌ detā huuñ aksar sab arziyāñ apnī

nahīñ lihāf ġhilāfoñ kī kaun baat kare
tū dekh phir bhī guzartī haiñ sardiyāñ apnī

zalīl hotā hai kab vo use hisāb nahīñ
abhī to gin rahā hai vo dihāḌiyāñ apnī

yuuñ baat kartā hai vo pur-tapāk lahje meñ
magar chhupā nahīñ paatā vo talḳhiyāñ apnī

bhale dinoñ meñ kabhī ye bhī kaam aa.egā
abhī sambhāl ke rakh lo udāsiyāñ apnī

hameñ hī āñkhoñ se un ko sunānā aatā nahīñ
sunā hī dete haiñ chehre kahāniyāñ apnī

mire liye mirī ġhazleñ haiñ canvas kī tarah
ukerata huuñ maiñ jin par udāsiyāñ apnī

tamām falsafe ḳhud meñ chhupā.e rahtī haiñ
kahīñ haiñ dhuup kahīñ chhāñv vādiyāñ apnī

abhī jo dhuñd meñ lipTī dikhā.ī detī haiñ
kabhī to dhuup nahā.eñgī bastiyāñ apnī

buland hausloñ ki ik misāl haiñ ye bhī
pahāḌ roz dikhāte haiñ choTiyāñ apnī

bhulā rahī hai tujhe dhuup 'dvij' pahāḌoñ kī
tū kholtā hī nahīñ phir bhī khiḌkiyāñ apnī

ye kaun chhoD gaya us pe KHamiyan apni
mujhe dikhata hai aaina jhurriyan apni

bana ke chhap lo tum un ko surKHiyan apni
kuen mein phenk di hum ne to nekiyan apni

badalte waqt ki raftar thamte hain huzur
badalte rahte hain aksar jo Topiyan apni

qataren dekh ke lambi hazaron logon ki
main phaD deta hun aksar sab arziyan apni

nahin lihaf ghilafon ki kaun baat kare
tu dekh phir bhi guzarti hain sardiyan apni

zalil hota hai kab wo use hisab nahin
abhi to gin raha hai wo dihaDiyan apni

yun baat karta hai wo pur-tapak lahje mein
magar chhupa nahin pata wo talKHiyan apni

bhale dinon mein kabhi ye bhi kaam aaega
abhi sambhaal ke rakh lo udasiyan apni

hamein hi aankhon se un ko sunana aata nahin
suna hi dete hain chehre kahaniyan apni

mere liye meri ghazlen hain canwas ki tarah
ukerata hun main jin par udasiyan apni

tamam falsafe KHud mein chhupae rahti hain
kahin hain dhup kahin chhanw wadiyan apni

abhi jo dhund mein lipTi dikhai deti hain
kabhi to dhup nahaengi bastiyan apni

buland hauslon ki ek misal hain ye bhi
pahaD roz dikhate hain choTiyan apni

bhula rahi hai tujhe dhup 'dwij' pahaDon ki
tu kholta hi nahin phir bhi khiDkiyan apni