Subscribe to our newsletter and get our newest updates

Mahshar Badayuni

  • Ghazal


kaun aashna hai kis pe nazar jae shahr mein


kaun āshnā hai kis pe nazar jaa.e shahr meñ
āḳhir ġharīb-e-shahr kidhar jaa.e shahr meñ

shīshoñ se haar kar talab-e-sañg meñ koī
simTe to reza reza bikhar jaa.e shahr meñ

itnā bhī tañg arsa-e-jāñ shahr par na kar
roz ik qabīla jaañ se guzar jaa.e shahr meñ

ab tak qadam hī dhuup meñ Thahre haiñ is taraf
tū chhāñv de to dil bhī Thahar jaa.e shahr meñ

sahrā kī aag pakke gharoñ tak to aa ga.ī
ab ye bhaḌaktī aag jidhar jaa.e shahr meñ

itnā na sochtā chale bāzār meñ koī
ghar us kā muntazir ho vo mar jaa.e shahr meñ

kaun aashna hai kis pe nazar jae shahr mein
aaKHir gharib-e-shahr kidhar jae shahr mein

shishon se haar kar talab-e-sang mein koi
simTe to reza reza bikhar jae shahr mein

itna bhi tang arsa-e-jaan shahr par na kar
roz ek qabila jaan se guzar jae shahr mein

ab tak qadam hi dhup mein Thahre hain is taraf
tu chhanw de to dil bhi Thahar jae shahr mein

sahra ki aag pakke gharon tak to aa gai
ab ye bhaDakti aag jidhar jae shahr mein

itna na sochta chale bazar mein koi
ghar us ka muntazir ho wo mar jae shahr mein


Source: Waridat

Leave a comment

+