kaun hote haiñ vo mahfil se uThāne vaale
yuuñ to jaate bhī magar ab nahīñ jaane vaale

āh-e-pur-soz kī tāsīr burī hotī hai
ḳhush raheñge na ġharīboñ ko satāne vaale

kūcha-e-yār meñ ham ko to qazā laa.ī hai
jaan jā.egī magar ham nahīñ jaane vaale

ham ko kyā kaam kisī aur parī se tauba
aap bhī ḳhuub haiñ be-par kī uḌāne vaale

jis qadar chāhiye biThlā.iye pahre dar par
band rahne ke nahīñ ḳhvāb meñ aane vaale

kyā qayāmat hai ki rulvā ke hameñ ai 'jauhar'
qahqahe maar ke hañste haiñ rulāne vaale

kaun hote hain wo mahfil se uThane wale
yun to jate bhi magar ab nahin jaane wale

aah-e-pur-soz ki tasir buri hoti hai
KHush rahenge na gharibon ko satane wale

kucha-e-yar mein hum ko to qaza lai hai
jaan jaegi magar hum nahin jaane wale

hum ko kya kaam kisi aur pari se tauba
aap bhi KHub hain be-par ki uDane wale

jis qadar chahiye biThlaiye pahre dar par
band rahne ke nahin KHwab mein aane wale

kya qayamat hai ki rulwa ke hamein ai 'jauhar'
qahqahe mar ke hanste hain rulane wale

Source: Book : Intekhab Kalam Lala M.R Jauhar (Pg. 63)