kisī gumāñ kisī imkāñ kā ruḳh nahīñ kartī
nigāh jalva-e-arzāñ kā ruḳh nahīñ kartī

basī huī hai jo ābādiyoñ meñ barbādī
junūñ kī mauj bayābāñ kā ruḳh nahīñ kartī

sabā ko fasl-e-bahārāñ se kyā milā āḳhir
vo gul khile ki gulistāñ kā ruḳh nahīñ kartī

hisār-e-vaqt meñ apnā vajūd hai mahbūs
asīrī ab rah-e-zindāñ kā ruḳh nahīñ kartī

mire azīzoñ meñ rusvā mirī rifāqat hai
jabhī ye halqa-e-yārāñ kā ruḳh nahīñ kartī

fazā to nūr-e-sadāqat se jagmagātī hai
ye raushnī dil insāñ kā ruḳh nahīñ kartī

vo kuchh nahīñ koī farsūda sī rivāyat hai
vo fikr jo na.e unvāñ kā ruḳh nahīñ kartī

havā bhī kitnī zamāna-shanās hai ai 'lais'
har ek sehn-e-gulistāñ kā ruḳh nahīñ kartī

kisi guman kisi imkan ka ruKH nahin karti
nigah jalwa-e-arzan ka ruKH nahin karti

basi hui hai jo aabaadiyon mein barbaadi
junun ki mauj bayaban ka ruKH nahin karti

saba ko fasl-e-bahaaran se kya mila aaKHir
wo gul khile ki gulistan ka ruKH nahin karti

hisar-e-waqt mein apna wajud hai mahbus
asiri ab rah-e-zindan ka ruKH nahin karti

mere azizon mein ruswa meri rifaqat hai
jabhi ye halqa-e-yaran ka ruKH nahin karti

faza to nur-e-sadaqat se jagmagati hai
ye raushni dil insan ka ruKH nahin karti

wo kuchh nahin koi farsuda si riwayat hai
wo fikr jo nae unwan ka ruKH nahin karti

hawa bhi kitni zamana-shanas hai ai 'lais'
har ek sehn-e-gulistan ka ruKH nahin karti