jab apne ġham kā fasāna unheñ sunāte haiñ
zamāna hañstā hai ham par vo muskurāte haiñ

mirī nigāh se jab vo nazar milāte haiñ
dil-e-ġharīb kī duniyā ujaaḌ jaate haiñ

hamārī āñkhoñ ne har inqalāb dekhā hai
zamāna vaale hameñ kis liye Darāte haiñ

ye kaisā jashn manāte haiñ gulistāñ vaale
guloñ ko toḌte haiñ āshiyāñ jalāte haiñ

zamāne vaale samajhte haiñ ham ko dīvāna
tumhāre husn ke jis vaqt giit gaate haiñ

tirī nigāh meñ saaqī ye kaisā jaadū hai
ki be-piye hī qadam Dagmagā.e jaate haiñ

jo terī bazm-e-tarab meñ kabhī guzāre the
vo lamhe ab bhī hameñ roz yaad aate haiñ

hamāre ashkoñ kī tābish pe hai nazar shāyad
jabhī to shaam se taare bhī jhilmilāte haiñ

vo kyā banā.eñge bigḌā nasīb ai 'kashfī'
jo mere hāl-e-pareshāñ pe muskurāte haiñ

jab apne gham ka fasana unhen sunate hain
zamana hansta hai hum par wo muskuraate hain

meri nigah se jab wo nazar milate hain
dil-e-gharib ki duniya ujaD jate hain

hamari aankhon ne har inqalab dekha hai
zamana wale hamein kis liye Daraate hain

ye kaisa jashn manate hain gulistan wale
gulon ko toDte hain aashiyan jalate hain

zamane wale samajhte hain hum ko diwana
tumhaare husn ke jis waqt git gate hain

teri nigah mein saqi ye kaisa jadu hai
ki be-piye hi qadam Dagmagae jate hain

jo teri bazm-e-tarab mein kabhi guzare the
wo lamhe ab bhi hamein roz yaad aate hain

hamare ashkon ki tabish pe hai nazar shayad
jabhi to sham se tare bhi jhilmilate hain

wo kya banaenge bigDa nasib ai 'kashfi'
jo mere haal-e-pareshan pe muskuraate hain

Source: Saaz-o-Naghma