karb hai karb kī āvāz barābar hai yahī
terī qīmat hai yahī terā muqaddar hai yahī

jī meñ hai ab kisī darvāze pe dastak de duuñ
aur phir pūchhūñ ki ai shaḳhs mirā ghar hai yahī

kaun samjhegā agar maiñ ne kahī bhī rūdād
chup hī ho jā.ūñ mire vāste behtar hai yahī

ab to jo zarra bhī dāman se lipaT jaatā hai
maiñ samajhtā huuñ mirā mehr-e-munavvar hai yahī

chāñdnī-rāt meñ ḳhud apne hī saa.e se milūñ
merā mūnis hai yahī ab mirā rahbar hai yahī

ab to har lahza har ik moḌ pe hotā hai gumāñ
jis ke baare meñ sunā ham ne vo mahshar hai yahī

sher kahne ko to ham ne bhī kahe haiñ 'nūrī'
ye jo ḳhāmosh sā baiThā hai suḳhnavar hai yahī

karb hai karb ki aawaz barabar hai yahi
teri qimat hai yahi tera muqaddar hai yahi

ji mein hai ab kisi darwaze pe dastak de dun
aur phir puchhun ki ai shaKHs mera ghar hai yahi

kaun samjhega agar main ne kahi bhi rudad
chup hi ho jaun mere waste behtar hai yahi

ab to jo zarra bhi daman se lipaT jata hai
main samajhta hun mera mehr-e-munawwar hai yahi

chandni-raat mein KHud apne hi sae se milun
mera munis hai yahi ab mera rahbar hai yahi

ab to har lahza har ek moD pe hota hai guman
jis ke bare mein suna hum ne wo mahshar hai yahi

sher kahne ko to hum ne bhi kahe hain 'nuri'
ye jo KHamosh sa baiTha hai suKHnawar hai yahi

Source: Funoon(Jadeed Ghazal Number: Volume-002)