haiñ agar dār-o-rasan sub.h-e-munavvar ke evaz
phir to ḳhurshed hī ubhregā mire sar ke evaz

ham ko bhī sar koī darkār hai ab sar ke evaz
patthar ik ham bhī chalā dete haiñ patthar ke evaz

farq kyā paḌtā hai ho jaa.e agar dād-rasī
ik nazar dekh hī lo va.ada-e-mahshar ke evaz

ham ne chāhā thā ki patthar hī se Thokar khā.eñ
sar bhī ik ham ko milā raah meñ patthar ke evaz

pāsbānān-e-chaman rah ga.e bairūn-e-chaman
nargis-e-ḳhufta milī sarv-o-sanobar ke evaz

ab kahāñ pahlā sā saaqī ke karam kā dastūr
aabrū bechnī paḌ jaatī hai sāġhar ke evaz

kyā ḳhabar hai vo chale aa.eñ sajā luuñ ghar ko
mauj-e-gul aane lagī aaj to sarsar ke evaz

un ke va.ade kī jo tasdīq bhī chāhī 'nūrī'
saaf inkār thā tā.īd-e-mukarrar ke evaz

hain agar dar-o-rasan subh-e-munawwar ke ewaz
phir to KHurshed hi ubhrega mere sar ke ewaz

hum ko bhi sar koi darkar hai ab sar ke ewaz
patthar ek hum bhi chala dete hain patthar ke ewaz

farq kya paDta hai ho jae agar dad-rasi
ek nazar dekh hi lo wada-e-mahshar ke ewaz

hum ne chaha tha ki patthar hi se Thokar khaen
sar bhi ek hum ko mila rah mein patthar ke ewaz

pasbanan-e-chaman rah gae bairun-e-chaman
nargis-e-KHufta mili sarw-o-sanobar ke ewaz

ab kahan pahla sa saqi ke karam ka dastur
aabru bechni paD jati hai saghar ke ewaz

kya KHabar hai wo chale aaen saja lun ghar ko
mauj-e-gul aane lagi aaj to sarsar ke ewaz

un ke wade ki jo tasdiq bhi chahi 'nuri'
saf inkar tha taid-e-mukarrar ke ewaz