na ghuum dasht meñ tū sehn-e-gulsitāñ se guzar
jo chāhtā hai bulandī to kahkashāñ se guzar

zamīñ ko chhoḌ ke nādāñ na āsmāñ se guzar
zarūrat is kī hai to un ke āstāñ se guzar

isī se terī ibādat pe rañg aa.egā
jabīñ jhukānā huā un ke āstāñ se guzar

hai asliyat hai ḳhizāñ hī bahār kī tamhīd
bahār chāhe to andesha-e-ḳhizāñ se guzar

vafā kī raah meñ daar o salīb aate haiñ
zarūrat is kī hai har ek imtihāñ se guzar

'kañval' ḳhushī kī huā kartī hai yūñhī takmīl
ġham-e-hayāt ke har bahr-e-be-karāñ se guzar

na ghum dasht mein tu sehn-e-gulsitan se guzar
jo chahta hai bulandi to kahkashan se guzar

zamin ko chhoD ke nadan na aasman se guzar
zarurat is ki hai to un ke aastan se guzar

isi se teri ibaadat pe rang aaega
jabin jhukana hua un ke aastan se guzar

hai asliyat hai KHizan hi bahaar ki tamhid
bahaar chahe to andesha-e-KHizan se guzar

wafa ki rah mein dar o salib aate hain
zarurat is ki hai har ek imtihan se guzar

'kanwal' KHushi ki hua karti hai yunhi takmil
gham-e-hayat ke har bahr-e-be-karan se guzar