ġham-e-hayāt ko likkhā kitāb kī mānind
aur ek naam ki hai intisāb kī mānind

na jaane kah diyā kis be-ḳhudī meñ saaqī ne
surūr-e-tishna-labī hai sharāb kī mānind

bahut qarīb se dekhā to inkishāf huā
vo ḳhaar ḳhaar hai shāḳh-e-gulāb kī mānind

mirā savāl ki kis ne mujhe tabāh kiyā
tirā sukūt mukammal javāb kī mānind

maiñ apnī āñkhoñ ko rakhtā huuñ bā-vazū har-dam
ki terā zikr muqaddas kitāb kī mānind

mujhe aziiz haiñ ḳhvāboñ kī kirchiyāñ bhī 'sabā'
kisī nigāh meñ hoñgī azaab kī mānind

gham-e-hayat ko likkha kitab ki manind
aur ek nam ki hai intisab ki manind

na jaane kah diya kis be-KHudi mein saqi ne
surur-e-tishna-labi hai sharab ki manind

bahut qarib se dekha to inkishaf hua
wo KHar KHar hai shaKH-e-gulab ki manind

mera sawal ki kis ne mujhe tabah kiya
tera sukut mukammal jawab ki manind

main apni aankhon ko rakhta hun ba-wazu har-dam
ki tera zikr muqaddas kitab ki manind

mujhe aziz hain KHwabon ki kirchiyan bhi 'saba'
kisi nigah mein hongi azab ki manind