bāteñ jo thiiñ durust purāne nisāb meñ
un meñ se ek bhī to nahīñ hai kitāb meñ

mahrūmiyoñ ne bazm sajā.ī hai ḳhvāb meñ
sab ke alag alag haiñ manāzir sarāb meñ

paanī kī tarah ahl-e-havas ne sharāb pī
likkhī ga.ī hai tishna-laboñ ke hisāb meñ

sab naam haiñ durust magar vāqi.a ġhalat
har baat sach nahīñ jo likhī hai kitāb meñ

sad-ātisha agar ho tirā rañg-rūp hai
jo rañg phuul meñ hai nasha hai sharāb meñ

us kā to ek lafz bhī ham ko nahīñ hai yaad
kal raat ek sher kahā thā jo ḳhvāb meñ

kuchh sher shāyad us ko pasand aa ga.e 'kamāl'
hoñToñ ke kuchh nishāñ haiñ tumhārī kitāb meñ

baaten jo thin durust purane nisab mein
un mein se ek bhi to nahin hai kitab mein

mahrumiyon ne bazm sajai hai KHwab mein
sab ke alag alag hain manazir sarab mein

pani ki tarah ahl-e-hawas ne sharab pi
likkhi gai hai tishna-labon ke hisab mein

sab nam hain durust magar waqia ghalat
har baat sach nahin jo likhi hai kitab mein

sad-atisha agar ho tera rang-rup hai
jo rang phul mein hai nasha hai sharab mein

us ka to ek lafz bhi hum ko nahin hai yaad
kal raat ek sher kaha tha jo KHwab mein

kuchh sher shayad us ko pasand aa gae 'kamal'
honTon ke kuchh nishan hain tumhaari kitab mein

Source: Book : Aazadi ke baad dehli men urdu gazal (Pg. 299)