qalam uThā.ūñ musalsal ravāñ-davāñ likh duuñ
koī paḌhe na paḌe maiñ kahāniyāñ likh duuñ

jahāñ tak aa.eñ tasavvur meñ vādiyāñ likh duuñ
phir un pe naam tumhārā yahāñ vahāñ likh duuñ

jahāñ mile mujhe roTī use likhūñ dhartī
jahāñ pahuñch na sakūñ us ko āsmāñ likh duuñ

nikal chalūñ kahīñ husn-o-junūñ ke jañgal meñ
hiran kī aañkh meñ kājal kī Doriyāñ likh duuñ

kahānī ḳhatm huī lekin is kā kyā kiije
jo lafz yaad ab aa.e unheñ kahāñ likh duuñ

jo zehn meñ haiñ hurūf un ko kaam meñ lā.ūñ
jo dukh paḌe hī na hoñ un kī dāstāñ likh duuñ

kuchh aisā patr likhūñ aap ko jo bhā jaa.e
marā huuñ aap ke gin apnī ḳhāmiyāñ likh duuñ

ġhazal to kah duuñ 'razā' ye bhī to ijāzat ho
jise tū hindavī kahtā thā vo zabāñ likh duuñ

qalam uThaun musalsal rawan-dawan likh dun
koi paDhe na paDe main kahaniyan likh dun

jahan tak aaen tasawwur mein wadiyan likh dun
phir un pe nam tumhaara yahan wahan likh dun

jahan mile mujhe roTi use likhun dharti
jahan pahunch na sakun us ko aasman likh dun

nikal chalun kahin husn-o-junun ke jangal mein
hiran ki aankh mein kajal ki Doriyan likh dun

kahani KHatm hui lekin is ka kya kije
jo lafz yaad ab aae unhen kahan likh dun

jo zehn mein hain huruf un ko kaam mein laun
jo dukh paDe hi na hon un ki dastan likh dun

kuchh aisa patr likhun aap ko jo bha jae
mara hun aap ke gin apni KHamiyan likh dun

ghazal to kah dun 'raza' ye bhi to ijazat ho
jise tu hindawi kahta tha wo zaban likh dun

Source: Rooh-e-Ghazal,Pachas Sala Intekhab